RIBEIRA> Unha solicitude conxunta á Xunta de Galicia por parte dos concellos de Lousame e Rois permitiralle a estes dous municipios poder adquirir un punto limpo móbil.
A achega, por un importe duns 81 mil euros, financiará a compra dun camión 100% eléctrico, equipado cunha caixa basculante, grúa de 1.500 kg e capacidade para transportar oito contedores adaptados para a recollida selectiva.
Os concellos asumirán o 10% restante e o IVE da actuación, o que supón unha achega conxunta dos 28 mil euros.
A conselleira de Medio Ambiente, Ángeles Vázquez, destacou que o éxito da convocatoria obrigou a tramitar unha ampliación de crédito para atender todas as solicitudes que cumprían os requisitos, demostrando o compromiso do Goberno Galego co medio ambiente e a economía circular.
Tanto a alcaldesa de Lousame, Teresa Villaverde, coma o alcalde de Rois, Ramón Tojo, agradeceron o apoio da Xunta, destacando a importancia deste servizo para facilitar a correcta xestión dos residuos nas zonas máis afastadas da recollida convencional.
O punto limpo móbil permitirá recoller residuos como papel, cartón, plásticos, vidro, metais, baterías, voluminosos e restos de poda, reducindo as emisións de CO₂ nunhas 7,7 toneladas anuais.
Ademais, prevese reducir nun 5% os residuos sen seleccionar no primeiro ano, cun obxectivo de acadar o 15% de redución en tres anos.
Este proxecto enmárcase dentro do plan de axudas da Xunta de Galicia, que este ano destinou 2,6 millóns de euros á mellora e creación de puntos limpos municipais.
