BOIRO> O Pazo de Goiáns acollerá entre o 28 de febreiro e o 1 de marzo a decimo novena edición do Encontro Arqueolóxico do Barbanza. Abordaranse investigacións tan destacadas como os últimos achados da Sima dos Osos na serra de Atapuerca.
Un ano máis, Boiro volverá converterse en capital da arqueoloxía cos encontros que se celebrarán no Pazo de Goiáns a última fin de semana de febreiro. Nesta decimo novena edición, serán 11 as conferencias programadas a cargo de 15 recoñecidos expertos no campo da arqueoloxía a nivel autonómico e nacional.
Ademais das conferencias que se desenvolverán durante toda a fin de semana, o programa inclúe varias saídas de campo ó Mosteiro de San Xoán de Poio, A Illa de Tambo e o xacemento da Corte do Santo na Pobra, o 7 e 8 de marzo.
Os interesados en participar xa se poden inscribir a través da web centroarqueoloxicodobarbanza.org tanto na modalidade libre como certificada para estudantes e docentes da USC. O límite de prazas é de 150.
