RIBEIRA> A consellería de Medio Ambiente e o concello de Ribeira buscarán solucións conxuntas para mellorar o funcionamento da depuradora. A alcaldesa mantivo un encontro coa responsable do departamento autonómico para avaliar tamén outros proxectos a executar no municipio como a rede de abastecemento en Cudieiros.
A alcaldesa de Ribeira desprazouse ata a consellería de Medio Ambiente para manter unha xuntanza coa responsable do departamento. María Sampedro e Ángeles Vazquez avaliaron a situación de diferentes instalacións hidráulicas no municipio, entre elas a depuradora que será obxecto de mellorar para optimizar o seu rendemento.
Unha das actuacións prioritarias será a substitución dunha arqueta que actualmente presenta problemas de corrosión derivados das filtracións de auga salgada. Ademais da mellora da EDAR, durante o encontro abordáronse tamén outras necesidade de actuación relacionadas cos servizos básicos como a ampliación da rede de abastecemento de Cudieiros, en Palmeira.
A alcaldesa trasladou ademais outras actuacións proxectadas nas distintas parroquias para ser avaliadas pola consellería de cara a seguir dotando de servizos básicos a tódolos recunchos do municipio.
