RIANXO> O goberno de Rianxo fixo balance da súa xestión cando se cumpren 1000 días dende a investidura. Acompañado polos concelleiros das distintas áreas, o alcalde destacou os importantes investimentos e servizos impulsados ata o momento así como os proxectos que pretenden materializar neste ano que queda de mandato.
Nestes mil días de goberno foron moitas as actuacións impulsadas polo executivo de Rianxo cunha forte aposta polos servizos básicos. A instalación de redes e a mellora dos accesos ós núcleos do municipio centrou boa parte dos investimentos.
Ademais dos investimentos, dende o executivo municipal destacan tamén a contención do gasto de diversas actuacións en materia de aforro enerxético que permitirán reducir os custos case á metade.
En materia cultural e deportiva, o executivo apostou polo mantemento dunha rica e variada programación anual estable destacando algúns proxectos xa encamiñados como a rehabilitación do auditorio municipal ou da antiga casa do mar.
No eido social, destacan grandes proxectos xa encamiñados como o futuro centro de día e a residencia de maiores xunto con outros xa en servizo como a Unidade de Atención Temperá.
Tras este exitoso balance, o concello agarda seguir a traballar durante o ano de mandato que aínda queda por diante para dar cumprimento ós compromisos adquiridos cando accederon ó goberno.
