RIBEIRA> O auditorio de Ribeira acolleu esta mañá a gala de peche do proxecto DiVersos no que participaron 11 centros educativos do municipio. A iniciativa busca poñer en valor a diversidade a través da música.
Os nenos de quinto de primaria de once colexios de Ribeira participaron na segunda edición do proxecto DiVersos. A través duns obradoiros impartidos polo músico Fernando Pérez e a técnica audiovisual Alba Pego, os pequenos compuxeron os seus propios temas para reivindicar a diversidade, o respecto e a igualdade a través da música.
A experiencia, ó igual que o pasado ano, foi do máis positiva para os alumnos que tiveron ocasión de afondar no mundo da música para lanzar unha mensaxe moi poderosa.
Dende a concellería de Servizos Sociais quixeron agradecer o traballo de todo o departamento neste programa que, de seguro, terá continuidade o próximo ano cunha terceira edición.
