BOIRO> As festas continuaron hoxe co tradicional Día das Peñas. O parque da Cachada converteuse no escenario principal dos festexos, cos orixinais xogos peñeiros e o mangueirazo de honra, a cargo este ano dun dos impulsores do Día das Peñas durante as festas, como é Quin Riveiro.
A calor daba un respiro nesta xornada na que Boiro cruzou o ecuador das súas festas de verán co Día das Peñas. Aproveitando a baixada dos termómetros, os peñeiros puideron dalo todo nas probas celebradas ó longo da maña. O xogo das cadeiras, a carretilla ou a corda foron algunhas das disciplinas nas que mediron forzas.
Trala entrega de premios ás tres peñas clasificadas, Os Esponjas, A Peña do Furancho e Mamá, salo a tomar algo, tivo lugar o mangueirazo de honra a cargo este ano de Joaquín Riveiro, un dos principais impulsores desta cita nacida hai xa dúas décadas.
Tras esta xornada, quedan aínda dous días de festa que chegarán á súa fin o mércores cun cartel musical de primeira liña. Ademais do concerto de 9Louro, as orquestras Los Satélites, Panorama e América de Vigo animarán a verbena para poñer o mellor broche ás celebracións.
