PONTECESURES > A Festa da Lamprea tivo este ano un pregoeiro de excepción: o escritor Xosé Neira Vilas. Numerosas autoridades e alcaldes respaldaron coa súa presenza a undécima edición desta festa gastronómica que se vai consolidando ano tras ano.
A festa da lamprea de Pontecesures contou cunha nutrida representación de autoridades que acudiron á undécima edición do evento gastronómico. Os delegados en Pontevedra de Industria e Medio Rural, Montserrat Prado e Gonzalo Constenla, ademais do subdelegado do Goberno, Delfín Fernández, estiveron presentes durante o discurso do pregoeiro Xosé Neira Vilas, que pronunciou un emotivo discurso cheo de referencias á emigración baseadas, precisamente, na súa condición de emigrante retornado da Arxentina.
O autor da célebre obra ‘Memorias dun neno labrego’ bromeou no seu discurso co mal tempo, ó que lle sacou, cómo non, o aspecto positivo.
Tralo pregón, os comensais deron saque ó millar de racións que se prepararon para a ocasión e que se degustaron na carpa instalada para a ocasión na zona portuaria.
Redacción Salnés
