VILAGARCÍA > Rematado o prazo de presentación de candidaturas para o oitavo congreso popular de Vilagarcía, Tomás Fole será o único candidato a presidir o Partido Popular no municipio. O concelleiro popular presentou a única candidatura apoiada por un total de 385 avais. Agora só queda o seguinte paso: a celebración do congreso local o vindeiro sábado.
A crise que se abriu no seo do PP de Vilagarcía coa dimisión, a mediados de febreiro pasado, de tres dos edís populares parece que se vai solucionando pouco a pouco. No prazo de inscrición para o oitavo congreso local só se presentou a candidatura de Tomás Fole, o actual presidente da xestora en Vilagarcía. Apoiado por 385 avais Fole superou con creces as 120 sinaturas que precisaba inicialmente.
A composición do novo comité executivo, que estará composto por unhas 25 persoas, será dada a coñecer durante o congreso local que se celebrará o sábado pero a deputada Marta Rodríguez é seguro xa que formará parte del.
O congreso terá lugar o sábado no Auditorio de Vilagarcía e asistirán o presidente da Deputación, Rafael Louzán, o presidente rexional, Núñez Feijoo e mailo secretario xeral, Alfonso Rueda.
Redacción Salnés
