PONTEVEDRA > A empresa Brenntag vén de emitir un expediente de despido colectivo para 7 dos 20 traballadores …
… que tiña no cadro de persoal da planta que ardeu en Caldas. Así o sinalou hoxe Comisións Obreiras, que denunciou o carácter oportunista deste despido.
Finalmente Brenntag non cumpriu co prometido e acaba de comunicar o despido a sete dos traballadores da planta que ardeu en Caldas o pasado 1 de setembro. Comisións Obreiras indica que a empresa mantivo hai uns 15 días unha reunión informal cos traballadores na que xuraba que non habería despedimentos senón recolocacións.
Esa foi a única xuntanza segundo o sindicato, que di ademais que a dirección está a manter negociacións individuais con cada un dos empregados. Pero a información á escasa, ‘ a xente que se acolle a esa recolocación non sabe onde vai ir nin como vai a ser o seu traballo’, sinalou Miguel Rey, delegado de CC.OO na fábrica de Brenntag en Caldas. En principio, dous dos traballadores quedarían en plantas de España e o resto irían para Portugal.
Comisións lembra que Brenntag lles comunicou a súa intención de instalarse provisionalmente nunha nave ó norte de Portugal e que valoraría o investimento nunha nova planta na zona para atender o mercado galego para recolocar ós empregados de Caldas. Por iso non entenden este expediente ‘discriminatorio e feito sen criterio obxectivo algún’, tal como indicou Ramón Bueno, secretario xeral de CC.OO en Arousa.
O sindicato remitiu á delegación de Traballo un escrito amosando a súa oposición ó expediente. Para o secretario comarcal de Comisións en Pontevedra, José Luís García Pedrosa, parte da culpa é da Administración, por mirar para outro lado en vez de buscar un novo emprazamento a Brenntag en Galicia.
Redacción Salnés
