O GROVE > Cada día que pasa a situación na lonxa do Grove faise máis insorportable. As vendedoras da praza de abastos seguen sen mercarlle producto á confraría en castigo pola decisión de montar un punto de venda propio. Para darlle saída ó peixe, o pósito decidiu sacar lotes pequenos que poidan compra-los veciños, algo que tampouco están dispostas a acepta-las praceiras.
A tensión cortábase cun coitelo esta tarde na lonxa meca. Tanto foi así, que tivo que intervir a Garda Civil. Segundo as mulleres, foi chamada pola confraría para denuncialas por acoso ós compradores. Ó parecer, as praceiras trataban de impedi-la venda directa ós veciños, que poden adquirir peixe na subhasta da lonxa sempre que o lote non supere os tres quilos.
Elas negan esa presión e denuncian as malas artes da confraría. Os socios da confraría aseguran que as praceiras nin mercan nin deixan mercar, e que non entenden esta actuación. Síntense perseguidos e acusados inxustamente, xa que non están cometendo ningunha ilegalidade. Pero as praceiras queren que a confraría desista da súa idea de vender peixe porque, aseguran, será ó seu fin.
Redacción Salnés
