POBRA > O BNG da Pobra do Caramiñal solicitou ó executivo local que acometa a mellora urxente da estrada que comunica o Campiño coa Mirandela e Sobral.
O concelleiro do Bloque Nacionalista Galego da Pobra do Caramiñal, Severino Romero Davila, presentou un escrito no concello denunciando a situación de total abandono que presenta a estrada que vai dende o Campiño ata a Mirandela e Sobral, na que dende hai tempo non se realiza un mantemento regular no que se refire á limpeza das súas marxes e cunetas.
Neste sentido, Severino Romero fai alusión ás herbas e á terra acumulada nos foxos que impiden segundo el o normal discorrer das augas, provocando serios problemas de inundacións ou malos olores ós veciños destas zonas.
O edil nacionalista sinala ademais que este problema non é exclusivo desta zona, pois existen outros lugares no concello que presentan a mesma situación, sen que o executivo local faga nada por remedialo.
Para Severino Romero Davila estas actuacións non suporían ademais un custe elevado para as arcas municipais, xa que a limpeza das cunetas e as marxes das estradas serían realizadas pola propia Brigada de Obras Municipal.
Redacción Barbanza