SALNÉS > Os tres detidos na operación Casona ingresaron en prisión tras declarar nos Xulgados de Pontevedra e Vilagarcía. Na vila arousana declararon o funcionario da Deputación de Pontevedra, Daniel Meaño Cores e o cabo da Armada, o veciño de Vilanova Javier González. Os dous foron detidos xunto cun garda civil destinado en País Vasco onde supostamente se ía introduci-la droga incautada.
A operación Casona foi desenvolvida pola UDyCO, en colaboración co GRECO Galicia, e baixo a dirección do Xulgado de Instrucción núm. 2 de Vilagarcía, ata onde se trasladaron hoxe os dous arousáns detidos: o ribadumiense Daniel Meaño Cores, funcionario da Deputación de Pontevedra e de 28 anos, e o veciño de Vilanova de 32 Javier González, cabo da Armada. Éste foi o primeiro detido onte na estrada Pontevedra-Vilagarcía, á altura de Curro.
Levaba 5 quilos de cocaína. A continuación foi interceptado outro automóvil, na mesma estrada e á altura de Alba no que ía o garda civil Javier Ferreiro, leonés pero destinado en Euskadi, a onde ía transporta-la droga. Posteriormente, foi localizado e detido en Barrantes, Daniel Meaño Cores, en cuxo domicilio se practicou un rexistro onde se atoparon máis de 170 mil euros ademais doutros efectos. Entre os obxectos incautados hai 18 teléfonos móviles que servirán, segundo dixo o delegado do goberno en Galicia, para seguir tirando do fío.
Daniel Meaño é curmán da muller do presidente da Deputación de Pontevedra, Rafael Louzán, quen hoxe anunciaba que o funcionario, que traballa como fontaneiro na Cidade Príncipe Felipe, xa foi suspendido de emprego e soldo.
Redacción Salnés
