“Contrastes” inicia a décima temporada en TVSB presentado polo xornalista Carlos Crespo

… novos convidados e novos temas para discutir o devir da actualidade, onde a seriedade, a rigurosidade e a pluralidade serán os eixes principais do debate.

Á fronte de Contrastes estará Carlos Crespo Gómez, licenciado en Ciencias da Información pola Universidade do País Vasco, onde ademais traballou para Euskal Telebista como guionista do programa dos servizos informativos ‘Ciudadanos’. Carlos Crespo leva desde 1995 exercendo como coordinador de suplementos de Faro de Vigo na edición de Arousa e, desde o 2004, é correspondente de Radio Nacional de España na comarca de Arousa. Actualmente, é ademais o coordinador das actividades do Foro Socioeconómico de Arousa ‘Iniciativa 3’.

Carlos Crespo estará acompañado cada semana de diversos convidados que analizarán, desde distintos puntos de vista, os asuntos informativos que ofreza a actualidade. Ó longo desta temporada poñeranse sobre a mesa temas como o botellón, o aniversario das riadas, as obras da autovía do Barbanza, ou as obras do Tren de Alta Velocidade e a posible eliminación da liña férrea que atravesa Padrón, Pontecesures, Valga e Catoira.

No programa deste luns, 29, Contrastes abordará o conflicto existente entre os bombeiros do Salnés e Protección Civil de Vilagarcía. Os convidados nesta ocasión serán a alcaldesa de Vilagarcía e responsable da Área de Seguridade Cidadá, Dolores García Giménez; o subdirector xeral de Emerxencias e Calidade da Protección Civil, Iñaki Bergareche Urdampilleta; o xerente dos Bombeiros do Salnés, Miguel Ángel Pérez; o xefe da Unidade de Bombeiros de Vilagarcía, David Padín; e o presidente da Agrupación de Voluntarios de Protección Civil de Vilagarcía, Francisco J. Guillán Busto. Serán 90 minutos de programa, que repite escenario de gravación, os salóns do Hotel Ciprés de Vilagarcía.

Contrastes emitirase tódolos luns ás 22:45 horas, e logo repetirase os martes ás 14:35 horas e os sábados ás 14:00 horas.

Redacción Salnés