VILAGARCÍA > Pese á derrota (71-84), as de Isaac Fernández continúan vivas na Eurocup, pasan de rolda coma terceiras de grupo e agora se enfrontarán ó Gran Canaria.
Intentouse por tódolos medios pero non puido ser. Había moitas gañas de revancha ante ás rusas pero foi unha americana a que desnivelou o partido: Monique Currie, 37 puntos e 8 rebotes para matar ela soiña a un Extrugasa ó que lle puido a ansiedade.
As vilagarciáns entraron ben no encontro, conseguindo unhas primeiras vantaxes de sete puntos (11-4 min.4). Pero ahí estaba Currie; sempre que o seu equipo a necesitaba, aparecía, ben acompañada nos primeiros compases por Danilochkina. Entre as dúas acortaron as diferencias a triple limpo.
Así as cousas o BC Moscú foille dando a volta o marcador e aproveitaron a empanada local para endosarlle un pacial de 9-30 que lles colocou dez arriba ó descanso: 38-48. Semellaba que o Extrugasa non podía defende-las rusas de ningunha das maneiras: non funcionaba a individual nin tampouco a zona.
Na segunda metade, as vilagarciáns saíron moito máis agresivas e ese pundonor mailo acerto de Miriam Herrera dende o 6,25 (tres triples consecutivos en dous minutos) colocou de novo no marcador un emocionante empate a 65.
Cun partido novo, con nove minutos por xogar, a ansiedade lles puido as vilagarciáns; a ansiedade, e Currie, que xogouse tódolas posesións do seu equipo, e non fallou. En tres minutos fatídicos, a ventaxe das rusas voltaba ós dez puntos. Ó final, 71-84, e o Extrugasa, pese a todo, estará na rolda de dezaseisavos.
O rival será o Gran Canaria; foron primeiras do seu grupo e iso dalles certo favoritismo, pero na liga española son oitavas e viaxan por detrás do Extrugasa. A eliminatoria será a ida e volta e contarase a diferencia de puntos. Fontecarmoa acollerá o primeiro partido alá polo 10 de xaneiro. Entre as ameazas do Gran Canaria, a americana Hodges e dúas vellas coñecidas da afección vilagarcián, Tuukannen e Piipari.
Sen tempo para o descanso, mañá a partires das 19:30 tocará vencer ó Rivas Futura en partido de Liga, se é que queren continuar nos postos de cabeza.
{flowplayer}images/salnes/bcmoscu.flv{/flowplayer}
Redacción Salnés
