SANXENXO > A Mesa para a Calidade Turística de Sanxenxo reuniuse esta mañá para abordar os puntos que o concello levará a cabo neste ano …
… no marco do Sistema Integral da Calidade Turística Española. Un programa co que pretenden que a oferta desta localidade, xa consolidada coma un dos destinos turísticos preferentes das Rías Baixas, gañe en calidade.
Na xuntanza de hoxe estiveron tanto membros do executivo local, coma representantes dos grupos políticos municipais, así coma do resto de organismos e institucións que forman parte da mesa. Entre eles, a Xunta de Galicia, o Padroado de Turismo Rías Baixas, Turgalia e tamén unha representación dos comerciantes e empresarios da localidade integrados en Entretendas e o Consorcio de Empresarios Turísticos de Sanxenxo. Todos eles abordaron na cita as principais actuacións que se van a levar a cabo tanto dende o concello, coma dende as empresas relacionadas co sector servizos. O obxecto, sinalou a alcaldesa da localidade, Catalina González Bea, acadar un estándar mínimo e uniforme da calidade turística, dende tódolos eidos comerciais, empresarias e hostaleiros.
Trinta establecementos da localidade que se veñen de integrar dentro do Plan de Calidade, tamén aportaron hoxe as súas propostas. Entre as iniciativas que se van aplicar este ano, están os cursos formativos dirixidas ás empresas, que comezarán esta mesma tarde ás seis e media, no Pazo Emilia Pardo Bazán.
Redacción Salnés
