VILAGARCÍA > A organización da Vilagarcía Basket Camp ven de confirmala presencia dos primeiros xogadores estrelas que acudirán á cita este verán. Serán Marcelo Nicola, ex de Tau e Barça, e o xogador do MMT Estudiantes Carlos Suárez.
Marcelo Nicola será a gran estrela que este ano visite a Vilagarcía Basket Camp. O aleiro arxentino de 37 anos, actualmente enrolado á Benetton de Treviso coma técnico axudante, é un gran coñecedor do baloncesto español, posto que xogou sete anos en Vitoria co Taugrés e unha temporada co Barcelona.
O outro xogador confirmado é o aleiro do Estudiantes Carlos Suárez, que depois da súa visita do ano pasado, repite participación. Falta por confirmar a presencia dun tercer convidado que se dará a coñecer nos próximos días.
Entre as grandes novidades desta edición da Basket Camp, a quinta xa, é que se celebrará en dúas fases ou turnos diferentes. Debido a gran demanda de inscripcións que ano a ano vai en aumento, dende a organización víronse na obriga de ampliar a dúas semanas de convivencia a súa oferta. Marcelo Nicola estará cos rapaces a primeira semana, que será do 29 de xuño ó 6 de xullo.
A segunda semana, do 6 ó 12 de xullo, os participantes recibirán ademais das clases de baloncesto, outras de inglés, para coñece-lo vocabulario baloncestístico. Unha iniciativa que xurdiu do convenio entre organización e universidade de Vigo. O ritmo de inscripcións está sendo altísimo.
Para a primeira semana tan só quedan 12 prazas libres mentres que para a segunda xa se ocuparon o 30% delas.
Toa Paterna, adestraror do Canasta Xerez e que estivo enrolado durante dezasete anos ó Unicaja Málaga, será o director técnico. Axudaralle nesa labor o adestrador do Inelga Juan Espiñeira.
Redacción Salnés
