SALNÉS > Cara e cruz para os equipos do Salnés que militan en Primeira Nacional B de fútbol sala. O Viajes InterRías de Sanxenxo sumou tres puntos tras gañarlle a domicilio ó Arzúa, mentres que o Grupo Junquera de Vilagarcía caeu ante o líder, o Loureiro-Cesuras.
O Grupo Junquera perdeu a súa imbatibilidade na liga de Primeira Nacional B ante o líder, o Loureiro – Cesuras, por un marcador de 6-4. Neste partido, o propio club arousán lamenta que puxo o xogo pero os goles foron do equipo coruñés. Os visitantes levaron todo o peso do partido, mentres que os locais practicaron un fútbol á contra e tiveron un porcentaxe altísimo de efectividade de cara o gol, dada a falta de contundencia en defensa do equipo vilagarcián.
O Cesuras logrou subir ó marcador 5 tantos na primeira metade e abriron a segunda con outro gol. O Grupo Junquera tratou de remontar pero só marcou 4. O club arousán critica os prexuízos que lle causaron os árbitros na segunda parte, xa que os de Cesuras tiñan cinco faltas e non se atrevían a pitarlle para non provocar o dobre penalti.
Mellor lle foi ó outro equipo do Salnés, o Viajes InterRías volveu de Arzúa cun resultado de 2 – 7. Os de Sanxenxo dominaron claramente o partido desde o primeiro minuto de xogo. O Arzúa esperábaos cunha defensa pechada coa idea de saír á contra, pero coa finalización de case tódolos ataques do InteRías a penas inquietaron a meta defendida por Néstor.
Na primeira metade, os visitantes xa sentenciaron practicamente o partido cun marcador de 5-1. Na segunda parte, seguiu controlando o InterRías, que marcou dous tantos máis, mentres que o Arzúa só acertaba a meter un máis. Os tres puntos permítenlle ós de Sanxenxo dar un salto na clasificación cara os postos altos.
Redacción Salnés
