SALNÉS> En total a Denominación de Orixe recolleu 23,6 millóns de quilos de uva, un 18,7 por cento máis que no 2008.
{flowplayer}images/salnes/271009_valoracion_vendima.flv{/flowplayer}
Con 23.600.000 quilos de uva nas adegas, a colleita do 2009 figura xa como a segunda máis abondosa na historia da Denominación de Orixe Rías Baixas. A produción supera nun 18,7 por cento á do ano pasado, un balance positivo que podería ser maior tendo en conta o número de viticultures que suma a DO, preto de 6.500.
Un incremento de volume importante aínda que desde o punto de vista técnico, o Consello Regulador decántase por salientar a alta calidade dos froitos e o seu bo estado sanitario. Sobre todo tendo en conta a climatoloxía adversa que se mantivo durante o ano, a excepción dos meses de agosto e setembro que acompañaron a fase de maduración. Como resultado: uvas cunha gradación alcohólica alta e niveis de acidez inferiores ós da última campaña.
Con moitas das fermentacións xa rematadas, e á falta das primeiras análises de mostos, os enólogos e técnicos de Rías Baixas apunta a que a anada 2009 traerá viños con máis corpo, moi aromáticos e sobre todo equilibrados.
En canto ó rendemento de produción por hectárea situouse nos 6.400 quilos. Por subzonas, o Salnés segue ocupando o primeiro posto en cantidade de uva recollida, algo máis de 14.600.000 mil quilos. Séguenlle O Condado, que supera os 4.700.000 e o Rosal, que roldou os dous millóns e medio. Detrás, Ribeiro do Ulla, con 520.000 quilos de uva colleitados e Soutomaior, 32.400. Por variedades, de novo o albariño acapara o maior volume da produción, un 95 por cento da colleita total.
Redacción Salnés
