VILAGARCÍA> Esta fin de semana presentouse nas instalacións do Liceo Casino de Vilagarcía o equipo Mexillón de Galicia. Un proxecto encabezado por Antón Paz e que agrupa á práctica totalidade dos regatistas galegos que optan a estar nos Xogos Olímpicos de Londres.
{flowplayer}images/salnes/antonpaz_141209.flv{/flowplayer}
Arroupados por numeroso público e por diversas autoridades, o Liceo Casino presentou o equipo que traballará a partir de agora por facerse un oco nos vindeiros Xogos Olímpicos de Londres e nos seguintes de Río de Janeiro. Co patrocinio de Mexillón de Galicia, porque así se chamará o conxunto, e coa colaboración das diferentes institucións, trátase dun proxecto máis que ambicioso. En Vilagarcía reuníranse case tódolos regatistas galegos que traballarán por estar nos Xogos. A vantaxe, que moitos deles son do Liceo Casino e que terán a súa base de operacións no recén estreado Centro de Tecnificación de Vela.
O equipo está formado por Ero Pons e Bernardo Paz en Finn, que buscarán no vindeiro ano estar no equipo preolímpico. En 470 Bruno Gago e César Conde proseguirán coa súa preparación que pouco a pouco os está a colocar entre os mellores. Na mesma clase, Esteban Gañete formará parella cun regatista canario. O Match Race femenino estará encabezado por Tamara Echegoyen, que volve a Vilagarcía tras formarse na súa xuventude no Liceo e dominar a competición no 2009 xunto ás súas compañeiras de embarcación. Ademais, o proxecto paralelo non olímpico do Vilagarcía de Platú 25, patroneado por Carlos Paz; campións Ibéricos, Nacionais e mundiais, que defenden a triple coroa este ano.
O equipo estará liderado por Antón Paz que buscará xunto ó seu irmán Carlos facerse un oco entre os mellores de España de 49er para poder ter opcións de meterse nos Xogos.
Redacción Salnés
