Abadía de San Campio acada o primeiro premio en Cambados

    CAMBADOS> Abadía de San Campio da adega Terras Gauda do Rosal ven de ser recoñecido como o mellor viño na Festa do Albariño de Cambados. Nesta vixésimo sexta edición tamén resultaron premiados a Quinta de La Erre, tamén do Rosal; e como terceiro premio Lagar da Costa, de Castrelo- Cambados.

    A Festa do Albariño de Cambados rematou co tradicional xantar albariñense, onde se entregaron os premios da vixésimo sexta Cata Concurso Rías Baixas Albariño. Nesta ocasión o gañador foi o viño Abadía de San Campio da adega Terras Gauda do Rosal. Unha adega que xa fora recoñecida neste certame no ano 1993. O segundo premio foi tamén para o Rosal, para o Albariño Quinta de la Erre da adega do mesmo nome que rexenta o matrimonio José Santiago Rodríguez e Eva Rubal. Unha empresa esta, Quinta de la Erre, de recente creación, que aposta por manter a tipicidade da zona de Eiras, onde naceron os caldos do Rosal. A medalla de bronce quedou na casa; na adega Lagar de Costa, de Castrelo. Este recoñecemento premia o saber facer dunha adegueira nova que procede dunha familia de fonda raizame na viticultura. Xunto ca entrega de premios, cabe salientar neste xantar a lectura do pregón por parte do embaixador xaponés Satoru Satoh; quen tamén ven de ser escollido Cabaleiro do Albariño. Xunto co embaixador, tamén estivo presidindo o xantar o Presidente da Xunta, que aproveitou o seu discurso para gabar o traballo cada vez máis esixente de viticultores e adegueiros desta DO.

    {flowplayer img=https://www.canalriasbaixas.com/images/ano2014/08agosto/04/ganador.jpg}https://www.canalriasbaixas.com/images/ano2014/08agosto/04/vinos_premiados_cata_concurso_nova.mp4{/flowplayer}