POBRA> A proximidade de Noitevella unida á escaseza de marisco e peixe por mor do temporal comeza a notarse nos prezos dalgunhas especies. A pesar das subas, na praza de abastos da Pobra non se queixan das vendas, animadas polas numerosas encargas para a fin de semana. Camarón, centola, percebe ou cigala son algunhas das especies con máis saída para fin de ano. Á alta demanda destes mariscos para as festas súmase á escaseza deste ano por mor do temporal que mantén a boa parte da flota amarrada. Aínda así, prevese que algunhas especies que se traballan ó abrigo como por exemplo a ameixa manteñan o prezo bastante estable. Con estas previsións, son moitos os consumidores que optan por encargar con antelación as viandas previstas para os menús de Noitevella e Aninovo aínda que, polo momento, non se pode garantir a abundancia de marisco.
Inicio BARBANZA
