CAMBADOS> A praga do picudo vermello que afecta ás palmeiras podería ser este ano máis agresiva. Os expertos advirten que a falta de tratamento nos exemplares afectados vai supoñer un repunte da infestación. Esta mañá, varios operarios estiveron actuando nas palmeiras da Alameda de Cambados.
A chegada da primavera e o paulatino incremento das temperaturas trae consigo o inicio do voo do picudo de vermello. Este insecto vai de palmeira en palmeira reproducíndose, deixando nelas as súas larvas.
Os expertos indican que esta tempada vai ser especialmente virulenta, polo gran número de palmeiras do Salnés infestadas que non foron tratadas.
Hoxe, os operarios estiveron a traballar nas palmeiras da Alameda de Cambados. Alí, hai varios exemplares onde se detectou a praga o ano pasado. Daquela xa foron sometidas a dous tratamentos, igual que o que recibiron hoxe. Aínda que o seu estado de saúde é delicado, a súa supervivencia seica está garantida.
Pero o certo é que, de entrada, non é fácil saber que palmeira está afectada, ata que os síntomas xa son demasiado evidentes.
As malas previsións que se auguran para os vindeiros meses quedan en mans do ceo. Do bo tempo e das temperaturas dependerá a virulencia deste andazo.
