PONTEVEDRA> Os viños Rías Baixas, imparables nos mercados internacionais. Na actualidade son 102 as adegas que participan nos programas de exportación do Consello Regulador, e pecharon o 2017 cunha facturación de 36 millóns de euros. Case un 8% máis que en 2017.
102 adegas, 36 millóns de euros, e un crecemento de case un 8% respecto do 2016. Estas son as cifras que deixaron os mercados exteriores durante o 2017 na Denominación de Orixe Rías Baixas.
A día de hoxe, as exportacións supoñen máis dun 26% do volume total de negocio da DO. Destaca, ademais, o elevado prezo que acadan os caldos de Rías Baixas, que acadan un prezo medio de 5,49 euros o litro.
Estes datos sitúan a Rías Baixas como a segunda denominación española cun maior volume de comercialización de viños brancos no estranxeito. Só Rueda supera estes datos. Non en van, no 2017 a DO incrementou case un 3% as súas exportacións, cun total de 6,57 millóns de litros de viño e chegando a 71 países.
A Conselleira do Medio Rural asegurou estar moi orgullosa dos resultados presentados polo Consello Regulador. Ángeles Vázquez destacou, ademais, o importante peso de Rías Baixas en Galicia.
Lonxe de perder folgos, a intención do Consello Regulador é apoiar a internacionalización das súas adegas, e neste ano porán en marcha oito plans promocionais específicos en Estados Unidos, Reino Unido, Alemaña, Irlanda, Países Baixos, Xapón, México e Polonia. A eles engadirán accións puntuais en países como Suíza ou Canadá.
