Abal ultima o convenio co Consello Regulador cun acordo de máximos sobre os horarios

CAMBADOS> Cambados ultima o seu convenio co Consello Regulador para a Festa do Albariño deste ano. A intención da alcaldesa é presentalo mañá ante os seus socios na xunta de goberno local. O acordo non deixa de lado o punto máis polémico desta edición da festa, e recolle que o peche das casetas se axuste ao cumprimento da lei autonómica. A norma fixa o horario máximo entre as 3 e as 4 da madrugada.

O convenio para a Festa do Albariño, pendente dos últimos retoques. A alcaldesa de Cambados e os representantes do Consello Regulador mantiveron varios encontros para dar forma ao documento, que aborda a cuestión máis controvertida desta edición: o horario de peche das casetas do Paseo da Calzada.

Ademais de recompilar os actos que xa son tradicionais no marco da festa, unha das novidades que contempla o convenio é a celebración dunha recepción oficial no concello dos gañadores do concurso da Festa do Albariño.

Concello e Consello Regulador tamén acordaron que nesta edición as copas terán un talo máis curto para evitar roturas e, aínda que descoñecemos o seu nome, xa se sabe que este ano unha muller será a encargada de dar o pregón inaugural da festa. Unha cuestión que está pendente de definir, é o espazo no que se ubicarán as casetas das adegas.

A intención de Fátima Abal é presentar o documento aos seus socios na xunta de goberno de mañá. O Consello Regulador tamén o levará a pleno; sesión que nun principio se celebrará o 21 de xuño.