GALICIA> Galicia mergúllase nun novo proceso de desescalada. Faino rescatando o sistema de tres niveis de restricións, que se aplicarán en función da situación epidemiolóxica de cada territorio. A reapertura será gradual e nas áreas sanitarias de Pontevedra e O Salnés e de Santiago Barbanza reábrese a hostalería e elimínanse os peches perimetrais por concellos. As medidas entrarán en vigor este venres.
A área de Pontevedra e O Salnés sitúase no nivel dous. Estarán permitidas as reunións de non conviventes (cun máximo de catro persoas), a hostalería poderá reabrir só en terraza e co 50% da ocupación, e deberá pechar ás 18.00 horas. En canto á mobilidade, poderá haber desprazamentos entre todos os concellos que forman a área sanitaria.
A área de Santiago e O Barbanza estará no nivel tres. Aquí tamén estarán permitidas as reunións de non conviventes cun máximo de catro persoas. A hostalería poderá abrir o interior cun 30% de capacidade e na terraza manterase o 50%. Ademais, deberá manterse a distancia de metro e medio de separación entre as mesas e o horario de peche será ás 18.00 horas. En canto á mobilidade, estará permitida entre os concellos que estean no mesmo nivel de restricións. No edio deportivo, permitiranse os grupos de catro non conviventes, sempre usando a máscara. Tamén poderán abrir as instalacións deportivas, ximnasios e piscinas.
Neste caso, os concellos da área sanitaria de Santiago e O Barbanza poderán desprazarse ata municipios das áreas de Lugo, Ourense e Vigo que teñan o mesmo nivel de incidencia.
O concello de Catoira é un dos 17 municipios galegos que se manteñen no máximo nivel de restricións pola súa incidencia a 14 días. Aquí continúan as limitacións vixentes, coa hostalería pechada, sen reunións de conviventes e sen que se permita a mobilidad fóra do concello, salvo por cuestións xustificadas.
As medidas entrarán en vigor este venres, día 26. Cada mércores, anunciaranse os posibles cambios nos niveis de restricións.
