O BNG demanda a reversión das zonas portuarias que non se dediquen a usos profesionais

BARBANZA> O BNG do Barbanza demanda a reversión dos terreos portuarios que non se destinan a usos profesionais. Pretende así que as zonas integradas no espazo urbano non estean suxeitas ó pago de taxas que consideran abusivas. O BNG demanda que espazos como paseos, alamedas e aparcadoiros que se atopan en dominio portuario pasen a ser de titularidade municipal posto que se atopan integrados na dinámica urbana dos distintos municipios. Na actualidade, os concellos vense obrigados a aboar tarifas abusvias pola realización de actividades nestes espazos, cuxo mantemento está a ser asumido con cargo ás arcas municipais. Ademais da reversión das zonas que non se dedican a uso portuario, os nacionalistas amosan a súa preocupación ante as numerosas deficiencias que presentan os portos da comarca.