Ence apoia ó deporte de base co seu Plan Social

Pontevedra> Ence continuou na xornada de hoxe coa sinatura das axudas da segunda convocatoria do seu Plan Social. Nesta ocasión foi a quenda dos proxectos vencellados ó deporte, área na que se beneficiaron 111 das 175 solicitudes presentadas.

A área de apoio ó Deporte de Base foi a que máis proxectos recibiu nesta II convocatoria do Plan Social Ence Pontevedra, cun total de 175. Das propostas presentadas, resultaron adxudicatarias 111.

Ás axudas ó deporte hai que sumar a financiación doutros 185 proxectos relacionados coa recuperación e coidado da contorna, a loita contra a exclusión social, o apoio á educación e a cultura, o impulso ó emprendemento e á innovación, e outras axudas veciñais. En total serán preto de 300 os proxectos que recibirán os 3 millóns de euros cos que están dotadas as axudas outorgadas pola papeleira, que nesta convocatoria dotarán de financiamento a 70 beneficiarios máis que na pasada edición.