CAMBADOS> Seguimos coa Festa do Albariño, porque xa coñecemos os recoñecementos que o Capítulo Serenísimo repartirá este ano. As novas donas e cabaleiros serán os protagonistas do acto do domingo, que se celebrará no patio de armas do Pazo de Fefiñáns. A escritora Nélida Piñeiro, o presentador e humorista Roberto Vilar ou o presidente de Freixenet, José Luis Bonet, son algúns dos nomes que pasarán a formar parte desta orde.
Xa coñecemos un dos segredos mellor gardados da Festa do Albariño de Cambados. O Capítulo Serenísimo deu a coñecer o nome dos novos Cabaleiros e Donas que pasarán a fomar parte da súa orde. A escritora Nélida Piñeiro é a única muller na lista de recoñecidos, que completan o presentador e humorista Roberto Vilar, o presidente de Freixenet, José Luis Bonet, o empresario brasileiro José Faro e Carlos Carrión, presidente da cooperativa Paco y Lola.
Este criterio foi tamén o escollido para seleccionar o nome dos galardoados nas categorías de Follas de Prata, Xóvenes Albariñenses e Albariñenses de Honra. Nesta última, destaca o recoñecemento do concello de Cigales, a proposta do concello de Cambados.
O acto celebrarase o domingo 5 de agosto. As case corenta confrarías participantes sairán dende o Auditorio da Xuventude ás 12 e media do mediodía.
Seguindo a tradición, o sábado o Pazo de Fefiñáns acollerá tamén o acto de irmanamento do Capítulo Serenísimo coa Confraría dos Enófilos da Bairrada.
