RIANXO> Ademais da habilitación de numerosas zonas de aparcamento, contarán con numerosos reforzos doutros corpos policiais durante os días de maior afluencia de xente. Os días grandes da Guadalupe, especialmente o fin de festa, poden chegar a congregar en Rianxo ata vinte e cinco mil persoas. De aí a necesidade de deseñar un operativo especial de seguridade para evitar accidentes ou disturbios. Como cada ano, habilitaranse aparcamentos nos arredores do casco urbano, tanto na zona de Rianxiño, como no Xogo dos Bolos e saída cara Tanxil. Incorporaranse tamén ás quendas de vixilancia, efectivos da policía local doutros concellos así como axentes da Garda Civil. Ademais de regular o tráfico e velar pola tranquilidade da festa serán os encargados de garantir a máxima seguridade en caso de accidente. De aí, que a última noite, os establecementos hostaleiros terán a obriga de retirar as terrazas unha hora antes do comezo da cantata para manter despexadas as saídas da praza en caso de evacuación. Tamén se procederá a reforzar a baranda da alameda do Campo de Arriba para evitar derrubamentos.