POIO> A ameixa babosa, a raíña da ría de Pontevedra, será tamén a protagonista da fin de semana en Campelo, no concello de Poio. A cita gastronómica cumpre a súa trixésimo primeira edición repartindo máis de 570 quilos deste bivalvo. Pero a Festa da Ameixa de Campelo promete máis que gastronomía: música, actividades culturais e o desembarco pirata forman un programa para todos os públicos.
570 quilos de ameixa babosa farán as delicias dos que esta fin de semana se acheguen ata Campelo. A parroquia poiense acolle a súa festa gastronómica dedicada a este bivalvo, extraído da ría de Pontevedra polas mariscadoras de Lourizán, Campelo e Raxó.
O sábado e domingo poderá degustarse na carpa gastronómica en tres elaboracións: con arroz ou fideos a 7 euros a ración ou á mariñeira, a nove. Pero a Festa da Ameixa de Campelo non é só gastronomía. As actividades arrincarán xa o venres.
A festa fusiónase este ano co festival musical, coas actuacións de Treixadura, Andy y Lucas e Claxxon durante a fin de semana. No programa tamén repite o desembarco pirata, pensado para todos os públicos.
O edil de Turismo apuntou que haberá 1.500 prazas de aparcadoiro gratuítas distribuídas en varias fincas de veciños cedidas para a festa. Ademais, a Policía Local porá en marcha un operativo de tráfico que restrinxirá o acceso rodado á Praza da Granxa. Poderase chegar a través das rúas Padre Avelino, Beiramar, Camiño Campo Loncras e Pedro Soto Couselo.
