POIO> O programa de andainas “Poio móvese” celebra este domingo o seu último itinerario. A “Ruta da ría”, que ten a saída e chegada no mosteiro, é das máis difíciles, pero tamén das máis atractivas e descoñecidas.
A “Ruta da ría”, que percorrerá 18 quilómetros e ten unha dificultade alta, pecha a tempada de andainas do 2018. O percorrido, de carácter circular, sairá do Mosteiro de Poio, ás 10 da mañá.
“Poio Móvese” comezou en abril coa “Ruta da Memoria”, chegou ata o bosque de sequoias, deu a coñecer os muíños do concello e retomou camiño despois do verán coa “Ruta da Arte” dende os petróglifos da Caeira. En total percorréronse 62 quilómetros en 5 andainas, con moi boa acollida, sobre todo nas rutas de maior dificultade.
Ademais da compoñente deportiva, “Poio móvese” ten como obxectivo dar a coñecer o patrimonio do concello para que actúe como reclamo turístico.
Hoxe é o último día para anotarse na “Ruta da ría”. Pódese facer a través do correo electrónico deportes.poiomovese@concellopoio.gal. Polo momento a acollida está a ser moi boa, con 226 persoas xa rexistradas. A actividade é de balde e contará con 2 avituallamentos durante o camiño, un sólido e un líquido, ademais do situado na saída e chegada da ruta.
Haberá recompensa para os que teñan participado de maneira regular. Aqueles que teñan rexistradas na súa tarxeta do “Poio móvese” 4 ou 5 andainas, terán como agasallo un bastón.
A concelleira de deportes anunciou que agardan repetir esta actividade no 2019, con rutas máis longas e con maior dificultade coa opción de facelas completas ou só algún tramo.
