PONTEVEDRA> Escolares da provincia de Pontevedra aprenden sobre compostaxe a través de xogos e actividades organizadas nos centros ó abeiro do Plan Revitaliza. Os máis pequenos coñecen máis sobre o proceso de tratamento de biorresiduos por medio de charlas e obradoiros.
No colexio San Xosé hoxe aprenden algo máis sobre a compostaxe. A través do “xogo da miñoca” coñecen novos datos sobre reciclaxe e tratamento de residuos.
A mascota educativa do Plan Revitaliza vai facendo preguntas aos distintos equipos sobre como se deben compostar os residuos orgánicos, que se debe botar na composteira e que non, onde se debe poñer a composteira, as características e propiedades do compost, ou se hai que remexelo, entre outras cousas.
As actividades adáptanse ós distintos grupos de idade para introducir ós pequenos na temática do lixo e a compostaxe dun xeito lúdico.
Ademais das actividades divulgativas, a campaña pretende que nos centros se instalen e comecen a empregar os composteiros.
As escolas poden solicitar a participación no programa de compostaxe escolar e os obradoiros na web www.revitaliza.gal.