PONTEVEDRA> Encontro entre o subdelegado do Goberno en Pontevedra e as entidades sociais da provincia que colaboran no proceso extraordinario de regularización de persoas migrantes. Abel Losada recibiu esta mañá a representantes Cruz Vermella, Asovedra e Boa Vida. A todos eles, Losada recoñeceulle o seu labor de asesoramento e acompañamento ás persoas solicitantes.
Entidades como Cruz Vermella, Asovedra, Boa Vida, a Confederación Intersindical Galega e SOS Racismo están a ser fundamentais no proceso de regularización extraordinaria de persoas migrantes. Un papel que hoxe quixo recoñecer a Subdelegación do Goberno en Pontevedra.
Losada puxo en valor esta medida impulsada dende o goberno do Estado. Unha decisión que, asegurou, permite que milleiros de persoas poidan desenvolver o seu proxecto de vida en igualdade de condicións e con plena seguridade xurídica.
Dende os colectivos apuntaron que actualmente os expedientes que están pendentes de regularizar son os máis complicados, referíndose sobre todo a casos de familias con nenos. Ademais, destacaron a importante carga de traballo que lles supuxo todo o proceso.
Finalmente, Abel Losada lembrou que esta regularización ten a súa orixe nunha Iniciativa Lexislativa Popular que contou cun amplo respaldo social e reiterou que se trata dunha medida baseada nos dereitos humanos, na integración e na convivencia.
