VILANOVA> O mal tempo non impediu que os nenos e nenas de Vilanova bailasen por un mundo en paz. Como cada ano, os escolares da localidade conmemoraron neste 30 de xaneiro o Día da Paz e da Non Violencia. Ademais, este ano, fixeron unha recollida solidaria de alimentos.
Un mundo en paz, sen guerras e no que ninguén se sinta discriminado por razón de raza, sexo ou relixión. En Vilanova, un ano máis, o Día da Paz celebrouse por todo o alto. O encontro dos escolares de tódolos colexios da vila tivo que desprazarse do campo do Terrón ó pavillón multiusos. O motivo: o mal tempo. Cun baile multitudinario, os rapaces demostraron o seu talento e aproveitaron para demandar un mundo libre de conflitos e violencias.
Tamén deron lectura a un manifesto. Este ano, os encargados de lelo foron Ian e Maira. Aproveitamos e preguntámoslles como ven eles o panorama mundial. Imos camiño de consegui-la paz ou este mundo anda revolto?
Por terceiro ano consecutivo, os rapaces dos distintos centros vilanoveses volveron facer unha recollida solidaria de alimento. De novo, todo o recadado foi para a ONG Amigos de Galicia. Segundo explican dende a entidade, na comarca hai moitas persoas que precisan deste tipo de axuda. Dende Amigos de Galicia aproveitaron, ademais, para agrade-lo xesto xeneroso dos rapaces de Vilanova nun día tan sinalado como o de hoxe, o Día da Paz.
