PONTEVEDRA> A Asociación de Xoves Empresarios de Pontevedra fixo esta mañá balance da súa actividade no 2018 e presentou os seus obxectivos para o vindeiro ano. O equipo directivo continúa apostando polas liñas estratéxicas que se marcou ó inicio de mandato, que son o fomento das sinerxías entre empresas e a expansión territorial.
AJE Pontevedra fixo hoxe balance do pasado ano e expuxo as iniciativas previstas para o 2019, no que celebra o seu 30 aniversario. O seu presidente mostrouse satisfeito polo incremento do 16,6% no número de asociados, que se sitúa en torno ós 150.
Pablo Fernández explicou que entre os obxectivos para os vindeiros meses está a ampliación da sede de Vilagarcía e a apertura do espazo para emprendedores no Porto de Marín, que contará con zona showcooking.
Sobre o tecido empresarial da cidade, Fernández explicou que está demasiado centrado no sector servizos, polo que sería necesario fomentar o emprendemento noutros eidos.
O presidente de AJE explicou que Pontevedra deixou de ser nos últimos anos o referente comercial da comarca.
Insistiu na necesidade de modernización do comercio, que cada vez está máis ameazado polas propostas online.
En canto ás posibilidades para a creación de novas empresas, anotou que sería interesante estudar a supresión da peaxe para acceder ó polígono de Barro-Meis.
No que se refire ás actividades de asesoramento e networking, continuarán a favorecer a conexión entre empresarios senior e emprendedores, e pretenden aumentar a oferta formativa, que se inaugura o vindeiro xoves, ás 19:30 horas, cunha xornada sobre subvencións para pemes.
