O novo servizo de ambulancias empeorará a cobertura no Salnés

VILAGARCÍA> A CIG denuncia a cara B do concurso para o novo servizo de ambulancias. O sindicato asegura que na comarca do Salnés a proposta da Xunta supón un empeoramento da cobertura diaria. A dotación da demandada ambulancia medicalizada virá acompañada da supresión do vehículo asistencial que cubría Vilagarcía e os seus arredores 12 horas diarias. Unha medida que, aseguran, desprotexe os veciños e aumentará as agardas.

Vilagarcía e a súa contorna perderán calidade asistencial co novo concurso da Xunta para adxudicar o servizo de ambulancias no Salnés. Aínda que a concesión traerá á comarca a demandada medicalizada, eliminará unha asistencial con base na capital arousá.

Dende a CIG denuncian que a medida non vén apoiada polas cifras. A ambulancia que se retirará co novo servizo apoiaba á que traballa 24 horas en Vilagarcía e na contorna. Xuntas realizaban ao redor de 5.300 servizos  por ano. Un traballo que non vai realizar a medicalizada.

A eliminación desta ambulancia aforrará á Xunta uns 130 mil euros ao ano. Pola súa banda, dotar a medicalizada dun único técnico de ambulancias suporá a perda de 30 postos de traballo.

Ademais, a CIG sinala ao alcalde de Vilanova como o responsable de que O Salnés non contara antes cunha ambulancia de soporte vital avanzado.

O sindicato fai un chamamento ao sentido común. Esta semana manterán un encontro co 061 para reclamar un cambio na súa postura.

DEIXAR UNHA RESPOSTA

Por favor, engade un comentario!
Por favor, engade o teu nome aquí