A Illa prepara un calendario de verán con festas semanais

A ILLA> A Illa afronta un verán intenso en festas. O concello presentou hoxe o seu calendario, con citas semanais  que enchen os meses de xullo e agosto. As propostas mesturan cultura, deporte, ocio e gastronomía, e nelas xogan un papel fundamental as asociacións e entidades deportivas do municipio.

Non haberá parada durante o verán na Illa de Arousa. Hoxe presentou o seu programa festeiro, que enche os meses de xullo e agosto de citas practicamente ineludibles.

Teñen especial peso as citas gastronómicas que repiten fórmula, organizadas por entidades deportivas para recadar fondos. Son cinco: a Festa da Navalla, do 25 ao 28 de xullo, a do mexillón do 2 ao 4 de agosto, a festa dos produtos do mar, do 9 ao 11 e do 15 ao 18, a da ameixa roxa, do 23 ao 25 e a do polbo, a fin de semana do 30 e 31 de agosto e 1 de setembro.

Na programación estas citas comparten protagonismo coas de carácter máis cultural e lúdico. É o caso do Carnavrán do 10 de agosto e de dúas propostas máis que consolidadas: O Mar nunha Flor, do 5 ao 10 de agosto e Cultura nos Cons, do 20 ao 22. Ademais, do 25 ao 31 será a Festa do Deporte, unha proposta para achegar as diferentes disciplinas aos veciños.

Outras citas marcadas en vermello nesta programación son as Festas do Carme entre o 17 e o 20 este mes e o Atlantic Fest, do 26 ao 28, que se ten convertido nun festival musical de referencia máis aló da nosa contorna.

DEIXAR UNHA RESPOSTA

Por favor, engade un comentario!
Por favor, engade o teu nome aquí