Difusión Felina podería pechar polas grandes débedas

PONTEVEDRA> A asociación Difusión Felina está atravesando o seu peor momento. Unha débeda de 3.000 euros podería obrigala, nos vindeiros meses, a pechar as súas portas. A organización conta actualmente con máis de 50 gatos en casas de acollida e pide a colaboración cidadá para poder seguir axudando aos felinos da cidade.

Con máis de 50 gatos en casas de acollida e cos recursos económicos limitados, o futuro de Difusión Felina é incerto. Actualmente, a asociación ten unha débeda de máis de 3.000 euros en veterinarios. O que podería levarlles, nos vindeiros meses, a deixar de rescatar e axudar a máis felinos.

Difusión Felina leva activa dende o ano 2013 e, dende entón, sobreviviu grazas ás doazóns de particulares. Por iso, sen subvencións e sen axudas por parte de empresas privadas, a asociación pide a colaboración da cidadanía.

Ademais das doazóns de particulares, a protectora de animais recalca a importancia de adoptar para que eles poidan seguir axudando a outros felinos que o necesitan. Dos máis de 50 gatos que teñen actualmente en casas de acollida, Fiuncha é un dos casos máis complexos.

Quen queira colaborar con esta asociación para que eles poidan seguir salvando vidas, pode informarse na súa páxina de Facebook. Calquera axuda será benvida.

DEIXAR UNHA RESPOSTA

Por favor, engade un comentario!
Por favor, engade o teu nome aquí