Aumenta o paro nas comarcas do Salnés e do Barbanza

O SALNÉS/O BARBANZA> Os datos do paro do mes de agosto son negativos  na ría de Arousa. Na comarca do Salnés destruíronse 76 postos de traballo e no Barbanza, 59.

A fin de moitos contratos temporais propios dos meses estivais. O sector da hostalaría é onde máis contratacións se rexistraron nestes últimos meses e é agora onde máis postos de traballos se destrúen.

Agosto nunca é bo mes para o mercado laboral. A fin dos contratos de verán en sectores como a hostalaría e o turismo soe deixar datos negativos.

Na comarca do Salnés a lista de desempregados incrementouse en 76 persoas.

Cambados é o municipio onde máis emprego se destrúe. Quedaron sen traballo 47 persoas. Séguelle Sanxenxo, onde se contabilizan 35 desempregados maís. En Vilagarcía, mentres, tivéronse que inscribir no paro 25 persoas.

Na comarca do Salnés só se rexistan datos positivos nos concellos da Illa, Ribadumia e O Grove.

Na comarca do Barbanza, entre tanto, son 59 os traballadores que tiveron que inscribirse nas listas do paro.

Por concellos, onde máis emprego se destruíu é en Boiro, con 74 novos parados. Na comarca barbanzá tamén aumentaron os desempregados en Rianxo, cun incremento de 16 persoas.

Na Pobra e Ribeira, mentres, atopamos os datos positivos. Nestes dous municipios, o número de desempregados reduciuse, coa contratación de 11 persoas no municipio pobrense e 20 no ribeirense.

No conxunto de Galicia Galicia rexistráronse 2.900 parados, un 1,9% máis que en xullo, o que deixa un total de 153.820 desempregados. Con todo, a lectura é positiva en termos interanuais: o paro baixou un 6,45 por cento con respecto a agosto do ano pasado.

O remate de agosto adoita deixar datos negativos por mor dos contratos temporais propios dos meses estivais. O sector da hostalaría é onde máis contratacións se rexistraron nestes últimos meses e é agora onde máis postos de traballos se destrúen.

Na comarca do Salnés, agora en setembro, a esperanza para moitos desempregados pasa por outra contratación temporal na vendima, cuxa campaña está a piques de comezar.