Os afectados polas lista de agarda chaman á mobilización social na súa primeira reunión en Vilagarcía

VILAGARCÍA> Cansos de agardar polas súas consultas médicas, un grupo de afectados está poñendo en marcha unha plataforma coa que pretenden denuncia-las demoras na sanidade pública galega.

Esta mañá reuníronse en Vilagarcía, nun encontro aberto. Din que aínda teñen por diante moito traballo para constituírse como colectivo, pero salientan que o máis difícil xa está feito.

Santiago leva un ano agardando por unha consulta en oftalmoloxía. Joaquín, nove meses por unha consulta por unha anxina de peito.

Fartos de enfrontarse a situacións como estas, este grupo de afectados decidiu impulsar unha plataforma, para denuncia-las longas listaxes de agarda na sanidade pública.

Esta mañá reuníronse por primeira vez en Vilagarcía, coa intención de loitar contra o que consideran unha inxustiza.

Ese colectivo vai agora camiño de facerse realidade. Hoxe mantiveron un encontro aberto, no que analizaron a creación duns estatutos e debateron sobre a súa denominación definitiva. Fan un chamamento á implicación de toda a sociedade. Explican que o problema das listas de espera é unha cuestión que afecta a todo ó mundo.

No colectivo agradecen o interese amosado polo Concello de Vilagarcía. Tiveron xa dúas xuntanzas co goberno local e hoxe puideron reunirse no Auditorio Municipal. Iso si, cargan contra a Xunta polo seu desleixo e denuncian que a sanidade pública galega está nun dos seus peores momentos.

Na plataforma queren tamén recoñece-la implicación persoal do deputado socialista Julio Torrado. O vilagarcián anunciou que porá en contacto este grupo de afectados cumpla asociación semellante que xa está en marcha en Santiago.