Os semáforos de Vilariño continúan apagados seis meses despois da súa instalación

CAMBADOS> Os veciños de Vilariño, en Cambados, reclaman a posta en funcionamento dos semáforos do cruce de Sineiro. Os elementos foron instalados pola Xunta este ano e, segundo a asociación O Batuqueiro, os trámites con Fenosa completáronse no mes de xullo. Agora, a pelota estaría no tellado do concello, responsable de facer a contratación coa compañía eléctrica.

Seis meses despois da súa instalación, os semáforos do cruce de Sineiro, na parroquia cambadesa de Vilariño, mantéñense apagados. A asociación O Batuqueiro recolleu a preocupación dos veciños.

A asociación asegura que tanto a Xunta como Fenosa remataron os trámites no mes de xullo. Agora, a pelota estaría no tellado do concello. Para O Batuqueiro, os veciños están no medio dunha “pantomima política”.

Ademais da posta en funcionamento dos semáforos, está pendente o pintado de varios pasos de peóns na estrada. O Batuqueiro explica que a Xunta non o fará nos víais da súa titularidade ata que funcionen os semáforos para evitar que a xente cruce sen estar regulado. Dende o concello, pola súa banda, xustifican precisamente nesta falta de pintado que aínda non se puxeran en marcha.

O edil de obras asegurou que o pintado xa está solicitado tanto na Deputación de Pontevedra como na Xunta de Galicia, administracións titulares das estradas que precisan desta actuación.