VILANOVA> Vilanova organiza neste mes de novembro unha serie de iniciativas para loitar contra a violencia de xénero. O programa inclúe proxeccións, un coloquio e mesmo unha actuación musical. Tamén se fomentarán as actividades nos centros educativos da localidade para concienciar contra os malos tratos xa dende ben pequenos.
Vilanova vólcase contra a violencia machista. Durante este mes, o Concello vai acoller un variado programa de actividades para visibilizar esta lacra.
Ademais de proxeccións, vaise celebrar un coloquio no que se debaterá sobre o papel das mulleres e dos homes na loita contra a violencia de xénero.
O 25 de novembro, coincidindo co Día Internacional da Eliminación da violencia contra a Muller, a Casa do Concello vai acolle-la lectura do manifesto institucional.
O programa culmina cun espectáculo musical moi especial, “Porque eu válloo” na sede social dos xubilados.
Ademais destas actividades, o Concello impulsa formación específica nos centros educativos do municipio.
O alcalde vilanovés reivindica estas iniciativas a prol da visibilización da violencia de xénero. Con todo, defende un endurecemento das penas para porlle couto á lacra.
Durán tamén cargou contra certos programas televisivos que, segundo dixo, fomentan dun xeito gratuíto a violencia verbal e física contra as mulleres.