POBRA> Unha camelia cultivada no Barbanza e plantada en terras traídas de Vilanova lembrará a Ramón María de Valle-Inclán nos xardíns pobrenses que levan o seu nome. Este acto, que se completou cunha ofrenda floral ante o busto do escritor, enmárcase nas xornadas divulgativas organizadas polo concello da Pobra.
A alameda da Pobra conta cunha nova variedade nos seus xardíns. Trátase dunha variedade de camelia xapónica creada na honra de Valle-Inclán que foi plantada esta maña por representantes dos concellos da Pobra e Vilanova, irmanados pola figura do ilustre escritor.
Este acto, enmarcado nas xornadas Valle-Inclán, que se desenvolven na Pobra durante os meses de outubro e novembro, contou tamén coa presenza do director xeral do Políticas Culturais, Anxo Lorenzo, quen destacou o importante papel das administracións locais como divulgadores da obra e da memoria dun dos galegos máis universais.
