CAMBADOS> Espectacular accidente o rexistrado esta pasada noite en Cambados. Un turismo saiuse da vía e acabouse esnafrando contra unha clínica dental. A pesar da aparatosidade do sinistro, o condutor do coche resultou ileso.
Vendo como quedou a cristaleira desta clínica dental, o sorprendente é que o condutor do turismo resultase ileso.
Aconteceu en Cambados, na rúa Olmo. Era a unha da pasada madrugada cando o condutor do vehículo, duns 30 anos, se saiu da vía e acabou empotrándose contra a cristaleira.
Os servizos de emerxencia confirmaron que na vía non se detectou ningunha vertedura que puidese ter provocado o sinistro. O condutor indicou que, simplemente, perdeu o control.
Os efectivos mobilizados tiveron que acabar apuntalando a fachada e tapiando a zona do impacto.
O sinistro sorprendeu a varios veciños da zona. Algúns mesmo baixaron á rúa para ver que acontecera.
Por sorte, e a pesar do aparatoso do accidente, todo quedou nun susto.
