Ríos desbordados, árbores caídas e rúas inundadas: así foi o paso de Elsa polo Salnés

O SALNES> As Rías Baixas van recuperando a normalidade logo do paso de Elsa. O temporal deixa na nosa contorna días desbordados, asolagamentos e árbores caídas, entre elas, unha palmeira nunha céntrica praza de Cambados. Esta é unha das localidades máis afectadas pola chuvia e o vento das últimas horas, pero non a única. Imos repasar algúns dos puntos onde os estragos do mal tempo deixaron pegada.

As imaxes falan por si soas. Este é o río Umia ao seu paso por Ribadumia. A auga saíuse do leito do río e mesmo chegou ata o Club de Piragüismo.

O paso de Elsa deixa na comarca do Salnés estampas como esta. A fronte foi especialmente activa nas últimas horas da tarde de onte, cunha multitude de incidencias repartidas por tódolos concellos da volta.

Un dos máis danados, Cambados. Esta é a praza do Concello, convertida nunha auténtica piscina. Unha escena insólita que se estendeu a outras rúas próximas.

Na localidade rexistráronse numerosos desprendementos e caídas de árbores. Unha das incidencias máis destacadas, a caída desta palmeira en Alfredo Brañas. A árbore non resistiu a forza do vento e acabou desplomándose, deixando sen subministro eléctrico ós veciños da zona. Os efectivos de emerxencia non pegaron ollo en toda a noite para atender tódolas incidencias rexistradas.

E despois da longa noite, hoxe máis do mesmo. O temporal foi a menos, pero o certo é que non parou de chover en toda esta xornada. Todos os efectivos continúan mobilizados polo que poida ocorrer.

O temporal tamén deixa estampas como esta en Sanxenxo. Na localidade rexistráronse asolamentos de estradas, cortes de rúas, desprendementos de pedras e tamén a caída dun muro.  Tamén se inundaron varias propiedades, como este garaxe situado en Canelas.

Producíronse tamén asolagamentos destacados en Caldas, no Grove, en Meaño e, en menor medida, en Vilagarcía.