VILAGARCÍA> Vilagarcía e Catoira apostan por unirse a través dunha senda polo litoral. Os concellos traballan nun proxecto de ruta de sendeirismo que transcorrería dende Carril- Cortegada ata as Torres do Oeste. Ademais, completarías con outras actividades, como viaxes pola ría.
Unir Vilagarcía e Catoira a través dunha senda polo litoral. Este é o novo proxecto no que están a traballar os dous municipios. A ruta sería duns 7 quilómetros, e transcorrería dende Carril-Cortegada, na vila arousá, ata as Torres do Oeste, xa en terras catoirenses.
Este proxecto nace como unha prolongación doutro no que xa traballaba Vilagarcía: levar o paseo marítimo ata a praia do Campanario, en Bamio. Agora súmase o concello de Catoira, e ambos municipios irán da man para levar adiante o proxecto.
Ademais, a intención é convertelo nun produto turístico máis ambicioso. A ruta podería complementarse con viaxes pola ría.
A de hoxe foi a primeira reunión entre os representantes dos dous concellos. Agora agardan celebrar un segundo encontro para avanzar no estudo das diferentes fases do proxecto.
