LOUSAME> O conselleiro do Medio Rural, José González, visitou esta mañá o miradoiro do Pico Muralla, compartido polos concellos de Lousame e Rianxo. Alí puido comprobar o resultado dunha actuación realizada neste emprazamento, sufragada cunha subvención do Agader duns 40 mil euros, que permitiu a posta en valor deste espazo.
Acompañado polos alcaldes de Lousame e Rianxo, municipios que comparten este novo miradoiro, o titular de Medio Rural puido comprobar o resultado dos traballos levados a cabo na zona e que permitiron a súa construción. A obra foi posible en parte grazas a unha subvención do Agader duns corenta mil euros. José González destacou o resultado final do proxecto de cara a potenciar un espazo situado nun entorno natural protexido.
Os dous alcaldes, tanto a rexedora de Lousame coma o rexedor rianxeiro, destacaron tamén o proxecto que se converterá, segundo eles, nun dos principais recursos turísticos da zona.
Finalizada esta visita, o conselleiro trasladouse tamén ó lugar de Xestoso para coñecer as instalacións da Sociedade Agraria de Transformación Santa Lucía beneficiaria do programa de axudas de plans de mellora, incorporación de mozos á actividade agraria e de desenvolvemento de pequenas explotacións agropecuarias.
