SALNÉS> Os concellos da contorna non cesan na súa loita por frear os contaxios do COVID-19. Ao longo da fin da semana e durante estes días son moitas as vilas que están a facer unha completa desinfección das súas rúas e establecementos máis importantes.
Os concellos da contorna queren evitar a toda costa a propagación do coronovarius. Para protexer á veciñanza, nos diferentes municipios estanse levando a cabo traballos de desinfección en tódalas rúas. As tarefas de fumigación tamén se estenden a outras zonas que nestes momentos adquiren gran importancia como é o caso dos centros de saúde, as farmacias, os supermercados e os bancos.
No municipio de Sanxenxo as tarefas de fumigación leváronse a cabo na zona de Portonovo. Durante a mañá os servizos de protección do concello estiveron desinfectado todas as rúas da vila, centrándose especialmente no casco vello. Nas tarefas están a traballar 11 persoas: os traballadores da concesionaria da limpeza, dous operarios municipais e dous veciños de forma voluntaria que cos seus tractores están axudando a axilizar os traballos. O plan de limpeza e desinfección continuará mañá no casco vello de Sanxenxo e nos vindeiros días en Vilalonga, Noalla e Dorrón.
No concello de Vilanova as labores estiveron centradas hoxe nas instalacións máis frecuentas como son os centros de saúde de Vilanova e Baión, os supermercados e os bancos, ademais das rúas máis transitadas como a de Rosalía de Castro, onde se atopa a sucursal de correos. Nestes momentos estase a proceder a unha desinfección total en todas as rúas.
Estas medidas de protección xa foron iniciadas por outros concellos durante a fin de semana. Municipios como Meis, Cambados e Valga desinfectaron as súas rúas con maior coidado nas zonas máis transitadas. Estas tarefas estanse levando a cabo polos equipos de protección civil, polos servizos de limpeza ou polos propios operarios dos concellos. En Cambados cóntase ademais coa colaboración das adegas.
