O sector do mar reclama un paro da actividade marisqueira por forza maior

RIANXO> Dende hai unha semana a confraría de pescadores de Rianxo mantén o peche da súa actividade marisqueira, como tamén fixeron a maioría dos pósitos arousáns. O patrón maior, Miguel Ángel Iglesias, afirmou que por riba de todo está a saúde dos traballadores.

Segundo nos confirmou, a día de hoxe no pósito rianxeiro xa hai confirmados dous positivos por coronavirus. Aínda así, ó problema sanitario, úneselle tamén a falla de mercado para o seu produto, o que provoca unha baixada moi notable dos ingresos.

O patrón maior rianxeiro non entende tampouco as razón polas que a Xunta mantén ó marisqueo coma un ben de primeira necesidade.

Por esta razón demanda un paro por forza maior para que os mariscadores se poidan acoller a algún tipo de axudas.

Outra das incógnitas, segundo el, é o tempo que durará esta situación, polo que agardan un cambio na postura da Administración, e se decida finalmente decretar un cese de actividade para así darlle unha saída viable ós miles de mariscadores afectados tamén pola crise do coronavirus.

DEIXAR UNHA RESPOSTA

Por favor, engade un comentario!
Por favor, engade o teu nome aquí