“Monoponte”, o Monopoly pontevedrés

PONTEVEDRA> Os xogos de mesa son sen dúbida o maior entretemento deste confinamento e, grazas a unha pontevedresa, a Cidade do Lérez conta co seu propio Monopoly. Unha estudante do Instituto Valle Inclán decidiu aproveitar estes días para adaptar o tradicional taboleiro a Pontevedra. Un modo de percorrer a Boa Vila sen saír das nosas casas.

Arrancamos esta partida dende a facultade de Belas Artes e, tras pasar por Campolongo e facer unha visita no cárcere da Lama chegamos ata a Illa das Esculturas. Así comeza este Monoponte. Un xogo de mesa adaptado á Cidade do Lérez que nos permite visitar e mercar as prazas, rúas e pontes máis importantes da Boa Vila. Esta idea naceu  de Sabela Estévez, unha estudante do Instituto Valle Inclán.

O primeiro paso para realizar este taboleiro foi adaptalo a Pontevedra e seleccionar as rúas, prazas e edificios máis destacados da cidade.

Se hai dúas cousas que abundan na Cidade do Lérez esas son sen dúbida as festas e as pontes. E xustamente estes foron os dous pequenos cambios con respecto ao taboleiro clásico.

Xogar a este Monoponte é completamente gratuíto e só fai falla poñerse en contacto coa creadora.

Como na versión tradicional, para xogar a este Monoponte fan falla dúas cousas. A primeira, o diñeiro. Algo que deberedes administrar moi ben se queredes mercar edificios como o Teatro Principal ou o Liceo Casino. A segunda cousa fundamental neste xogo é ter sorte. Sobre todo se queredes encontrar un párking gratuíto na cidade ou se non queredes encontrarvos cun alcalde que vos mandará directamente ao cárcere.